ALUMI HUSI FTA UNPAZ HETAN OPORTUNIDADE HODI HALO JOB-TREANING IHA INDONESIA

ALUMI HUSI FTA UNPAZ HETAN OPORTUNIDADE HODI HALO JOB-TREANING IHA INDONESIA

Dili-Universidade da Paz (UNPAZ) liuhusi Fakuldade Teknologia Agrikola hala’o serimónia asina Memorandum Of Understanding (MoU) ho ASIAN AGRI PT INTI INDOSAWIT SUBUR, iha ne’ebé asina direta husi Magnifiku Reitór UNPAZ, Dr. Adolmando Soares Amaral, Lic. Eco.,MM. ho Diretór Ezekutivu ASIAN AGRI PT INTI INDOSAWIT SUBUR, Piter Wijaya, ne’ebé akompaña husi Estrutura Universidade, iha Aula Prof. Dr. Lucas da Costa (14/06/23).

Magnifiku Reitór, Universidade da Paz, Dr. Adolmando Soares Amaral, Lic. Eco.,MM, hateten ami familia bo’ot universidade da paz hato’o, agradese tebes ba Asian-Agri PT Inti Indosawit-subur mai iha universidade ida ne’e, hodi halo servisu hamutuk entre Timor-leste ho Indonesia, liu-liu universidade da paz, agradese ba oportunidade ne’ebé iha hodi haruka ami nia alumi atu hetan treinamentu no kontinuasaun sei uza ba iha servisu ninian. Ami Timor-Leste foin ukun-aan iha tinan 21 nia laran no Unpaz foin eziste tinan 19 maibe sei iha frakeza barak liu-liu iha kompaña, infraestutura no rekursu umanu menus liu.

“Ami espera katak husi ita-nia servisu hamutuk hanesan ne’e, bele ajuda ami iha edukasaun formal no non-formal nian espesifiku ba alumi fakuldade teknolojia agrikola ne’ebé sei rekruta no oferese oportunidade treinamentu ho di’ak ba hasa’e sira nia kapasidade no sei bele kontinua uza sira hanesan servisu-na’in ba futuru, tanba Fakuldade teknolójia agrikola nu’udar fakuldade ne’ebé ki’ik liu iha Unpaz no gradusaun husi fakuldade teknolojia agrikola ne’e minimu tebes, kada tinan fakuldade simu estudante foun ho de’it 30% lahanesan ho fakuldade sira seluk. Hahú husi fakuldade ne’e eziste to’o mai iha 2022 finalista sira seidauk to’o 1000”,tenik Reitór UNPAZ.

Iha fatin hanesan, Diretór Ezekutivu ASIAN AGRI PT INTI INDOSAWIT SUBUR, Piter Wijaya hatutan, Asian-Agri PT INTI Indosawit-Subur durante ne’e hetan informasaun katak, joven sira husi Timor-Leste mesak forsa no forte, tanba ne’e liga ho kompaña nia planu hodi ba hala’o periodu iha Brazil no ita presija kapasidade ne’ebé bele ko’alia lian Indonesia no lian Portugués. Iha fulan tolu liubá ami mai iha Unpaz no simu ami ho di’ak lo’os, depois fulan tolu mai fali asina memorandu hodi kontinua kapasidade husi Unpaz hodi ba hala’o job-treaning iha Asian-Agri inti Indosawit-Subur.

“Alumi sira ne’ebé mak ba sira sei la hasai sira nia osan dolar ruma, tanbá ticket treinamentu kompaña mak selu to’o iha ne’ebá, sira sei hetan akomodasaun ho montante $235 kada fulan, bainhira sira servisu ona mak sira sei simu osan bo’ot ho montante $400 usd kada fulan, maibé sei aumenta mós bonus hodi selu ba eletrisidade, Uma ne’ebé sira hela no sira mós sei simu motor”,dehan Diretór Ezekutivu Piter Wijaya.

Sorin seluk, Dekanu Fakuldade Agrikola Sr.Jonio dos Santos, Lic. Tec. Agr.,M.Agr. esplika, universidade hetan negosiasaun husi emprezáriu iha fulan tolu ba kotuk hodi distribui alumi sira husi fakuldade agrikola ba hala’o job-treaning no tenaga kerja.

“Ita hahú hetan negosiasaun iha fulan tolu ba kotuk, sira mai buka parseiru iha Timor liu-liu iha universidade ne’ebé mak iha fakuldade agrikultura entaun sira hili mak Unpaz no Untl, sira hili Unpaz tanba ita nia departamentu rua ne’ebé relevante ho sira nia programa, tanbá ne’e ita halo akordu antes no ohin ita realiza ita ninia asina nota de entendimentu. Objetivu primeiru husi akordu ne’e mak sira presija ita nia alumi ne’ebé iha kapasidade atu ba tuir job-treaning durante fulan neen iha Indonesia-Sumatra, depois de formasaun alumi sira ne’ebé iha kapasidade bele haruka ba iha rai-liur liliu empreza sira nia parseiru iha Europa no alumi sira ne’ebé menus kapasidade sira sai fali Employer iha sira nia empreza iha Indonesia, iha buat rua importante mak Job-Treaning no Tenaga kerja,” dehan dekanu.

Dekanu ne’e salienta, rekrutamentu ba alumi sira ne’e liuhusi online no sira asesu mai iha fakuldade hodi entrega sira nia dokumentus, haree sira nia dokumentus kompletu mak ita entrega ba iha empreza depois mak sira fo teste. Tanba ne’e-test sei hala’o iha loron ohin no empreza rasik mak sei fó test online, liuhusi link ne’ebé sira fó no rezultadu teste sira sei analiza no sira rasik mak sei fó sai ba Unpaz. Alumi sira ne’ebé atu liu ka la liu la’os fakuldade no unpaz mak hatene, maibé rezultadu hotu empreza rasik mak deside. Empreza sei fó oportunidade daruak ba alumi sira ne’ebé karik la konsege tuir -test online tanbá empreza husu ita-nia alumi na’in 150 hodi aranka iha faze dahuluk nian no sira ne’ebé mak sei liu iha primeira faze sei ba hala’o job-treaning iha fulan Jullu tinan ne’e.

Partisipa iha serimónia asina nota kooperasaun ne’e, Magnifiku Reitór, Universidade da Paz, Dr. Adolmando Soares Amaral, Lic. Eco.,MM. Diretór Ezekutivu ASIAN AGRI PT INTI INDOSAWIT SUBUR, Piter Wijaya, ho ekipa. Estrtura Senadu Universidade ne’ebé kompostu husi, Vise Reitores sira, Dekanu Fakuldade 6, Xefe Departamentu sira, Dosente inklui estudante sira.