FAKULDADE DIREITU REALIZA ELEISAUN HODI HILI SENADU ESTUDANTIL FOUN TINAN AKADÉMIKU 2024-2025
Dili-Universidade da Paz (UNPAZ) liu-husi Senadu Estudantil Fakuldade Direitu, hala'o atividade eleisaun, hodi hili Senandu Estudantil foun tinan akadémiku 2024-2025, iha Salaun José Casimiro (25/09/24).
Reprezenta terseiru vise Dekanu Estudantil Fakuldade Direitu, Sr. Rui Lay, Li.Dir., MD, hateten eleisaun ida ne'e ita hotu nian, tanba ne'e husu ba fakuldade Direitu tenki partisipa maximu, atu bele fó imi nia votus ba maluk na'in haat ne'ebé kandidatu an iha ita nia fakuldade Direitu Universidade da Paz.
Nia dehan hanesan baibain ita iha programa tinan-tinan sempre iha mudansa ba senadu foun, tanba ne’e mak tinan ida ne’e ohin loron ita hahu eleitu ba senadu foun tarde ituan, maibé ha’u fiar katak tuir lolos ita bo’ot sira ne’ebé mak kandidatu an ba senadu.
“Senadu ne'e atu ita lori imi nia kolega sira-nia hanoin sira-nia inspirasaun atu lidera sira ba oin ho di’ak iha ita nia fakuldade, tanba ne’e mak ha’u hanoin ita bo’ot sira orsida atu ba eleisaun husu ba ita bo’ot na’in haat ne’ebé atu kandidatu an ne’e karik hato’o ita bo’ot sira-nia programa ba ita bo’ot sira-nia kolega sira, hodi nune’e sira bele tau konfiansa bo’ot ba ita bo’ot sira iha tempu tuir mai”,dehan Nia.
Iha fatin hanesan, Senada Estudantil Fakuldade Direitu, Flavia Alves Caldeira Neves, esplika husu ba kolega sira hotu ne’ebé hamahan an iha universidade da Paz liu-liu fakuldade direitu durante ne’e sai nudar senada iha ita nia fakuldade direitu husu ba ita bo’ot sira-nia konsiensia atu nune’e bele hili senadu eleitu ne’ebé mak sei lori ita bo’ot sira ba hasoru problema individu no kria atividade extra kurikuler ne’ebé mak barak no di’ak liu iha ami nia mandatu ne’ebé liu ona, atu nune’e ita bo’ot sira bele senti duni mandatu senadu nia durante 2024 to’o 2025. Parabens ba kandidatu na'in haat maski feto laiha maibé ita bo’ot na'in haat enkoraja ita boot sira bele mai kandidatu an ba senadu foun nian iha fakuldade direitu.
“Iha biban ida tan ha’u hakarak husu ba ita bo’ot na'in haat ne’ebé orsida ida ne’ebé atu sai manan na'in ba iha elisaun ida ne’e karik, ha’u husu ita bo’ot sira atu rona ita nia kolega sira-nia preokupasaun, no responsabilidade ne’ebé mak ita bo’ot na'in haat iha ne’e la’os responsabilidade ida ne’ebé mak milagre tun husi lalehan mai, maibé responsabilidade ida ne’ebé mak ema barak ninia konfiansa fó ba ita bo’ot sira, atu sai hanesan lideransa ida iha ita bo’ot sira mandatu durante tinan ida nia laran”,Tenik senada
Universidade da Paz nudar instituisaun Superior edukativus nebe realiza apredizazen, pesquizas, no sai servidor/pengabdian ba sidadaun sira hodi fiar metin ba direitu fundamental ema nian, tuir normas Universal sira no konstituisaun RDTL 
