UNPAZ HO G7+ ASINA NOTA INTENDEMENTU HODI HAMETIN KOOPERASAUN

UNPAZ HO G7+ ASINA NOTA INTENDEMENTU HODI HAMETIN KOOPERASAUN

Dili-Universidade da Paz (UNPAZ) nia Magnifiku Reitór, Dr. Adolmando Soares Amaral, Lic. Eco.,MM. akompaña husi estrutura sira, hodi asina nota intendementu ho Secretario Geral G7+, Sr.Helder da Costa, hodi hala’o servisu hamutuk iha futuru, iha área Peskiza, nomó Estudante sira halo estajiu Profisional inklui organiza seminariu hamutuk, iha edifisiu G7+ (08/03).

Magnifiku Reitór, Universidade da Paz, Dr. Adolmando Soares Amaral, Lic. Eco.,MM. hateten Universidade da Paz, iha paz no iha esperiensia ida ne’ebé presija asegura Informasaun sira ne’ebé ita fahe ba ita nia povu sira atu nune’e povu ki’ik sira bele kompriende.

”Paz ita hare’e ba iha kontestu ne’ebé iha mundu, ita nu’udar ema humanu ne’ebé moris iha mundu, tenki iha responsabilidade morál mak Unpaz mós hakarak hola parte iha paz ne’e, depois ba servisu ne’ebé mak sira halo, sira mós bele ajuda atu bele fahe informasaun no hatutan ba estudante sira atu bele aplika tuir paz no estabilidade”,tenik Reitór Unpaz.

Reitór ne’e hatutan, nu’udar akadémiku tenki asegura politíka, hodi fahe tutan informasaun sira ne’e, atu nune’e ema hotu labele mukit ba informasaun, no sira bele komprede depois sira bele ko’alia buat di’ak iha rai ida ne’e mak iha dame no paz.

Aliende ne’e, Secretario Geral G7+, Sr. Helder da Costa, hato’o obrigadu wain ba Magnifiku Reitór UNPAZ ho estrutura tomak, ne’ebé fó komfiansa mai ami hodi sai hanesan knua ba programa estajiu Universidade da Paz ba estudanrte sira.

”Ita tenke iha parseria nomós diresaun nasional hakarak atu ko’alia kona-ba paz no estabilidade hodi hari’i konseitu dezenvolvimentu iha ita nia rai doben Timor-Leste, apresia tebes Magnifiku Reitór, ho estrutura tomak nia komfiansa, ita nia asina nota intendementu ida ohin ne’e, bele inspira sira seluk, G7+ odamatan nakloke”,haktuir Secretario Geral G7+, Sr.Helder.

Partisipa iha asina nota intendementu ne’e, Magnifiku Reitór, Universidade da Paz, Dr. Adolmando Soares Amaral, Lic. Eco.,MM. Secretario Geral G7+, Sr.Helder da Costa, ho ekipa, Estrutura UNPAZ nian kompostu husi, Vice Reitór, Dekanu Fakuldade 6, Xefe Departamentu nomós Pro-Reitor sira.