UNPAZ-ESTRUTURA UNIVERSIDADE DESLOKA ONA BA INDONESIA HO TRAVEL

UNPAZ-ESTRUTURA UNIVERSIDADE DESLOKA ONA BA INDONESIA HO TRAVEL

Dili-Universidade da Paz (UNPAZ) liuhusi estrutura ohin desloka ona ba Indonesia ho objetivu atu selebra asina nota entendimentu hamutuk ho universidade lubuk ida ne’ebé atu halo koperasaun servisu hamutuk iha futuru, iha Kampus UNPAZ (21/07).

Magnifiku Reitór Universidade da Paz, Dr. Adolmando Soares Amaral, Lic. Eco.,MM. hateten delokasaun ohin ba Indonesia hodi hatan ba iha komvite, la’os ita mak halo planu la’e, tanba komvite mai husi universidade lubuk ida iha Indonesia, tanba ne’e mak ita husu ba sira di’ak liu ita hili provinsia ida ita hotu konsentra iha ne’eba, ho nune’e sira husi Jakarta, Surabaya, Bali nomós ita husi Timor-Leste ita hasoru malu iha Kupang.

Nia hatutan, hasoru malu entre universidade sira ne’e, ita atu asina nota entendimentu ho universidade públiku nomós privadu sira, tanba ne’e mak ita husu ba sira di’ak liu ita foti iha sentru, imi mós mai ami mós ba hasoru malu iha Kupang, ita bele selebra asina nota entendimentu koperasaun ida ne’e, grasadeus sira husi universidade Jakarta, Surabaya no Bali sira mós konkorda bele mai, tanba ne’e mak ita hotu hasoru malu iha Kupang hodi selebra asina nota entendimentu ida ne’e.

“Buat lubuk ida mak ita sei hala’o iha futuru, tanba ne’e depende ba artigu sira ne’ebé iha nota entendimentu nia laran, ita husu para depois bele buka tan bolsu estudu ba ita nia dosente sira iha nivel mestradu no doutoramentu, nomós peskiza hamutuk hodi halo públikasaun artigu siéntifiku ba iha nivel internasional no halo seminariu hamatuk inklui atividade sira seluk”,dehan Reitór UNPAZ.

Entretantu deslokasaun familia bo’ot Universidade da Paz ba iha Indonesia, reprezenta husi estrutura, Magnifiku Reitór Universidade da Paz, Dr. Adolmando Soares Amaral, Lic. Eco.,MM. Dekanu Fakuldade 6, Xefe Departamentu sira, Vise Reitor ho Vise Dekanu sira, Proreitor, inklui Diretor Unidade sira.